كلمات اغنية بنات المعنا صالح اليامي

بنات المعنا كلمات

الموال

العذر من شاعرٍ مفني القلم بـ كتابة ايده

عارفن كيف يتجاوز لا تجاوز بـ النظامي

ما ذكر في لابته بيتين من عرض القصيده

ما يلام ولو لحقْه اللوم .. مخطيه الملامي

دون يذكر لابته .. عصما و لهجتها شديده

مخطرٍ لا يطري العجمان و اتسلّ الحسامي

الهجوس اللي تدير النظم نظرتها بعيده

تحسب الاخطار قبل وقوعها ف الاصطدامي

الـقـصـيـدة

الفكره اللي تقاودلي مقاود ذلول

وانا من الحرص منها قاصرٍ قيدها

لي مده اطرد وراها والقريحه جفول

كن الفرايد شوارد من مطاريدها

واليوم احمد الله اللي جابها فالحلول

ابسحب عقال من حقوي و اعقل ايدها

الموهبه في طبيعتها فتون و عيول

وانا عمدت اتغيشمها وانا اجيدها

تحقيق الاحلام صعب وصعب عنه العدول

واصعب من اهمالك الامال تجديدها

ياهل المزاين ترا بعض القصيد معلول

في صيهد منيف حول بالنذير الرسول

لـ منافسين المعنّا كانه يفيدها

لحدٍ يفاخر بعدّه ماضيات الفعول

جينا نهدم الهقاوي عقب تشييدها

من كان له حيلةٍ يحتال ياهل الفحول

على الحيالات نِشهد روس اشاهيدها

لا جن بنات المعنّا ماش حيله و حول

عن شوطها كم خصيمٍ ناوي يحيدها

فردي صدر و الوسط فردي وفردي معزول

الضرب عمّم مقرّدها و اجاويدها

ازرا يحول المنافس بينها و المثول

قدم المنصات و ازرا عن تهاديدها

مالومهم يوم جبنا مخلفات العقول

تفايطو و اخلو الها ميدها ميدها

عقلا وسندا ومطيوره و حسنا دلول

نوطاً يثوّر غبار الشوط خبط ايدها

من الخشم للمتون الى العراقيب هول

عديمة الوصف مفنيةٍ قواصيدها

لافرعت واستجنت كل صفراً حفول

كن عرضها للمشاهد عيدها عيدها

تقول طامح وريثة شيخ ختم الشمول

مطمع شيوخ القبايل قبل اواليدها

آيه من آيات خلق الله جمال وقبول

في كل ليله منقضةٍ عجاريدها

طيشي يا زعامه القاضي حكم بالاصول

وجيه الانذال مكفيّه بتجريدها

العام الاول تبيّنّا و راغ الخجول

واليوم جبنا الشهاده في مواعيدها

غر الغشيم الشكر بملاسبه للزمول

واليوم ناقه مع البل وارتخى ديدها

ماينصت العاقل الا في كلام معقول

وماينصت الجاهل الا في خثاريدها

كبو هباب السوالف و اروعو للفعول

اكثر كلام البدو من كثر ترديدها