كلمات اغنية يا جميله الوليد ال عامر

يا جميله كلمات

أسعد الله روحك وقلبك ووجهك ياجميله

وجهك اللي جنة الدنيا وبسمتها قباله

في سنا وجهك ظلام الليل غدراته ذليله

بدرن ايمد النجوم بضيها مكثر جماله

الخدود البيض وعيونن محاجرها كحيله

سلهمتها توصل قلوب النشامى للثماله

والقوام المنهصر والعنق يشكي من جديله

والذرابه والفخامه والركاده والاصاله

جل شان اللي مصور حسنها رب الجلاله

من بعد ماصوبتني والفكر تايه سبيله

وردت نايف بعد نظراتها درب الجهاله

واعذاب اللي عيونه ماتنام بكل ليله

مايعرف النوم لين الصبح يبدي له غزاله

الاوادم لاهنت بالنوم جاوبها عويله

يقنب فواده وعينه تشتكي مما جراله

قدرة الله حطته بين الظروف المستحيله

يوم قلبه أعلن لعقله سقوطه واحتلاله

ما لقى فزعة صديق ولالقى فزعة قبيله

موقفه ياللاسف خلاه مع حظه لحاله

والزمان بقصته ما جاب طاري للعداله

يلتوي من جرحه اللي في معاليقه يشيله

صابرن شامخ ولو الموت بالغرات جاله

هو صويب ويعتزي ويقوم ماعنده وسيله

مايبا الحاسد يفوز بطيحته والا زواله

العتيبي لو يبيع العمر مايرضى الفشيله

لاجل وجهه يرخص الغالي وحاله مع حلاله

العتيبي يحسب حساب المكارم والفضيله

يوم ولد اللاش يبلش في مخاسير الشكاله

يومها صاحت مضاوي نمتطي سرج الكحيله

مرخصين العمر فـ دروب المراجل والبساله

واحدن مثلي يجي لك شايل الموت بشليله

يقصر طوال اليماني فعله اللي من شماله

جعل مالي مدتن بين الرجال إلا الجزيله

راس قوم و ربعي الهيلا كريمين السباله

والقصيد اللي كتبته فيك ما تلقى بديله

عقب الفنجال رجالن يغني لك بداله

والوليد ابن آل عامر ما يشيل أيات شيله

مايشيل إلا القصيد اللي طغى فيه الجزاله

كل يوم وقلبي البراق في وصلك يخيله

وكل ليل فـ عشقك اكتب لي قصيده مع مقاله

والغرام العذب مر وكلها نفس الفصيله

دام قيس بعشق ليلى مالقى خطة وصاله

ياحبيبي حبنا لايضيع فـ القمرا دليله

احفظه وانا حرام إني مجود لك حباله

حبنا حبن نزيهن ما معه ريبه وحيله

الشريف ان حب مايغدر ولايقطع وصاله

والحسود اكحل عيونه جعل ما يبرد غليله

خل موته بالقهر لاتتركه يدرك مناله

اسرج خيول الغرام ووقفتي ماهي بخيله

عاشقك فـ ساحة العشاق مايبرد نضاله

ماخبرت اللي تحداني على وقفه نبيله

ولاخبرت اللي تهقوى ياخذ حقوقي جهاله

أتحدى لو غرامي تقدر تحصل مثيله

هد قلبك لا يجيه الشك والريب وجفاله

لاتشك بحب قلبي ثم يعلن لك رحيله

الفراق المر لاتفتح على قلبي مجاله

العتيبي كان حب وشكك بحبه خليله

يعلن امن الود والافراح والشوق اعتزاله